भिवरी बोपगाव रस्त्यावर भीषण अपघात पिसर्वे गावचा तरुण जागीच मृत्युमुखी ; अपघातानंतर टेम्पो चालक फरार

मुख्य संपादक सह्याद्री माझा हनुमंत वाबळे :
भिवरी-बोपगाव रस्त्यावर भीषण अपघात; दुचाकीस्वाराचा मृत्यू, टेम्पोचालक फरार

**सह्याद्री न्यूज नेटवर्क | पुरंदर**

पुरंदर तालुक्यातील भिवरी-बोपगाव रस्त्यावर भरधाव ४०७ टेम्पोने पाठीमागून दुचाकीला जोरदार धडक दिल्याने दुचाकीस्वार गिरीश गोरख कोलते यांचा मृत्यू झाला. अपघातानंतर जखमीला उपचारासाठी दाखल न करता आणि घटनेची माहिती न देता टेम्पोचालक घटनास्थळावरून फरार झाल्याची तक्रार सासवड पोलीस ठाण्यात दाखल करण्यात आली आहे.

पोलिसांकडून मिळालेल्या माहितीनुसार, बुधवार, दिनांक २८ ऑक्टोबर २०२६ रोजी सकाळी सव्वा आठ ते साडेआठच्या वाजण्याच्या सुमारास भिवरी गावच्या हद्दीत भिवरी-बोपगाव रस्त्यावर ९९ बेकरीपासून सुमारे १०० मीटर पुढे हा अपघात घडला. गिरीश गोरख कोलते हे त्यांच्या पल्सर दुचाकीवरून (क्रमांक MH 12 ZZ 3586) जात असताना सासवडच्या दिशेकडून आलेल्या ४०७ टेम्पोने (क्रमांक MH 02 ER 2032) त्यांच्या दुचाकीला पाठीमागून जोरदार धडक दिली.

या अपघातात गिरीश कोलते यांच्या डोक्याला गंभीर दुखापत झाली. या दुखापतीमुळे त्यांचा मृत्यू झाला, अशी फिर्याद त्यांचे काका बाळासाहेब राघु कोलते (वय ६६, रा. पिसर्वे, ता. पुरंदर, जि. पुणे) यांनी दिली आहे. अपघातास कारणीभूत ठरलेला टेम्पोचालक जखमीला मदत न करता घटनास्थळावरून निघून गेल्याचेही फिर्यादीत नमूद करण्यात आले आहे.

या प्रकरणी सासवड पोलीस ठाण्यात गुन्हा रजिस्टर क्रमांक ५४०/२०२६ नोंदविण्यात आला आहे. पोलीस हवालदार जाधवर तपास करीत असून, प्रभारी अधिकारी वरिष्ठ पोलीस निरीक्षक संतोष घोळवे यांच्या मार्गदर्शनाखाली पुढील तपास सुरू आहे.

**अपघात करून घटनास्थळावरून पळ काढणाऱ्या अज्ञात टेम्पोचालकाचा शोध घेण्याचे आव्हान आता सासवड पोलिसांसमोर आहे.**
हॅशटॅग: #भिवरी #बोपगावरोड #पुरंदर #सासवडपोलीस #अपघात #दुचाकीअपघात #टेम्पोचालकफरार #पुणेजिल्हा #सह्याद्रीNewsNetwork